熱刺唔做「好人隊」　干地貪李察利臣夠火爆

最強博彩盤路過關神器《串績王》：http://win.on.cc/football/　

熱刺今個夏天大展拳腳，上星期以6,000萬鎊收購巴西前鋒李察利臣，令強大鋒線如虎添翼！以性格火爆見稱嘅李察利臣亦好識撈，日前喺IG貼出佢以往同阿仙奴「埋牙」嘅相片，向呢支熱刺同市死敵宣戰，據報領隊干地就係睇中佢嘅火爆脾氣，希望擺脫熱刺「好人」風格。

25歲嘅李察利臣由愛華頓轉投熱刺後，即喺IG貼佢喺19/20球季對阿仙奴嘅相片，相中阿仙奴球員丹尼施巴路斯受傷倒地，李察利臣就怒睥同佢「埋牙」嘅比利連，全無懼色，大批熱刺球迷即刻派Like，大讚李察利臣已經成為熱刺球迷英雄。

李察利臣出名火爆，上試過同對手甚至自己隊友「開拖」，場外又同加歷查等名宿舌戰，上季尾用煙花掟向觀眾席一事仍被足總調查。摩連奴曾形容熱刺球員「太好人」，喺聯賽爭霸會輸蝕，據報熱刺領隊干地就係睇中佢夠火爆，希望超強鬥心嘅佢可以為呢支「好人球隊」注人暗黑風格。