女子歐國盃開打!她們點只球星咁簡單

20220705
東網電視
更多新聞短片
最強博彩盤路過關神器《串績王》:http://win.on.cc/football/ 
女子歐國盃聽日開打,16支勁旅爭奪冠軍后座!女子足球近年於歐洲愈來愈受重視,好多國家都有女子職業聯賽,而且不乏樣靚球技又好嘅球星,唔少IG Follower仲多過藝人,正式開波前,一齊去認識吓呢班星!
雲迪當克獲封最可愛10號
衞冕嘅荷蘭上屆女子歐國盃歷史性奪冠,被譽為「最可愛10號」嘅中場雲迪當克亦人氣爆燈,呢位女足風頭躉五官標緻極有明星相,IG更有55.7萬粉絲追隨,加上瀟灑踢法被譽為「女版洛賓」,難怪受到球迷追捧。
荷蘭女足喺上屆歐國盃奪冠,再喺2019年世界盃拎亞軍,雲迪當克都係靈魂人物,呢位30歲球星曾效力阿仙奴6年,上年先至轉會里昂,雖然因為重傷而休戰大半季,但總算趕及出戰歐國盃,而且今屆賽事喺英格蘭舉行,雲迪當克對生活過6年嘅地方肯定唔會陌生。
同女朋友分途出擊
雲迪當克並冇隱暪自己性取向,佢女朋友就係英格蘭國家隊前鋒、前阿仙奴隊友美亞特,上月底英荷踢熱身賽,呢對情侶都有份上陣,結果美亞特梅開二度帶領英格蘭大勝5比1。
雲迪當克
年齡:30歲
國籍:荷蘭
球會:里昂
位置:中場
李雅舒奧娜德國新希望
李雅舒奧娜係德國女足近年最耀眼新星,佢喺艾遜女足闖出名堂,2020年轉會拜仁慕尼黑女足,立即協助球隊稱霸德甲女足。2021年更係佢事業發展飛躍階段,全年為拜仁攻入17球、為德國女足攻入11球,順利高票當選德國年度最佳女子足球員。
自小訓練踏上成功路
一頭金髮、外表溫柔但性格硬朗嘅李雅舒奧娜,兒時獲母親栽培接受足球訓練,最終踏上女足之路,至於佢伴侶亦係體壇名將、帆船女子世界冠軍羅拉華迪露,兩人互相扶持,力爭各自領域嘅最佳成績。
李雅舒奧娜
年齡:24歲
國籍:德國
球會:拜仁慕尼黑
位置:前鋒
「女版伊巴」艾絲蘭妮廣告界寵兒
講到瑞典足球,球迷一定先諗起伊巴謙莫域,而女足代表就係「女版伊巴」艾絲蘭妮。呢位32歲前鋒以速度同技術見稱,有趣嘅係,佢同伊巴謙莫域走嘅足球路都好相似,兩人喺2012年至2016年間分別效力巴黎聖日耳門男女足,2016年伊巴謙莫域加盟曼聯,艾絲蘭妮同年就轉投曼城。
155秒內曾入3球
歐國盃前啱啱由皇家馬德里轉投AC米蘭嘅艾絲蘭妮,上年初曾經喺西甲創下155秒內入3球嘅神級紀錄,好波之餘外型亦都討好,令佢成為廣告商寵兒,代言合約包括運動品牌、可樂、汽車、同家庭用品等等,佢甚至推出屬於自己嘅兒童故事書,百足咁多爪。
艾絲蘭妮
年齡:32歲
國籍:瑞典
球會:AC米蘭
位置:前鋒
佩迪拉絲勢為狂牛放異彩
佩迪拉絲可以話係「女足版美斯」,佢嘅少女時代曾喺巴塞隆拿受訓,成長時期正是「巴西2R」李華度、朗拿甸奴效力巴塞隆拿嘅黃金時期,佩迪拉絲深受多位巴塞巨星影響,終於喺2021年獲得女子金球獎,以及國際足協世界足球小姐殊榮。
佩迪拉絲在西班牙女足馳騁12年,早期效力愛斯賓奴、利雲特女足,2012年加盟巴塞隆拿女足後事業騰飛,奪得6次西甲女足冠軍,3屆歐聯女足冠軍。呢位當年追捧李華度、朗拿甸奴、恩尼斯達嘅少女,現在亦成為女足界嘅偶象。
同美斯相似,佩迪拉絲喺巴塞隆拿贏盡一切,但喺國家隊成績一般,只曾於青年隊時期贏過兩屆U17女子世界盃,今屆女子歐國盃,佩迪拉絲領軍嘅西班牙女足,絕對值得期待。
佩迪拉絲
年齡:28歲
國籍:西班牙
球會:巴塞隆拿
位置:進攻中場
希格貝芝女足平權擁護者
希格貝芝係首屆女子金球獎得主,不過2018年得獎,全憑佢喺里昂嘅超卓表現,與國家隊無關,因為希格貝芝喺2017年上屆女子歐國盃之後,就選擇唔代表挪威女足出戰,原因係佢當時不滿挪威足總對男女足不公而作出嘅抗議。
其實2018年希格貝芝贏得金球獎時,亦受到性別歧視,主持問佢會否跳「電臀舞」慶祝,當時希格貝芝即場變臉,一句「No」就走咗去。一向支持「平權」嘅希格貝芝之後喺IG批評,詢問女子足球員會唔會跳「電臀舞」,係貶低佢喺足球上嘅成就。
經過多年努力,挪威足總提升對女子足球重視程度,終於令希格貝芝回心轉意,佢喺今年3月重新為挪威女足披甲,大家可以喺今屆女子歐國盃,一睹呢名女子歐聯入球紀錄保持者(59球)嘅風采。
希格貝芝
年齡:26
國籍:挪威
球會:里昂
位置:前鋒
艾娜東妮唔揀C朗冧般費
英格蘭女足由曼市球員撐起半邊天,當中年紀輕輕嘅艾娜東妮甚為搶鏡,踢得之餘仲經常喺社交平台上載靚相派「軍糧」,深得球迷歡心。呢位美少女喺曼聯接受青訓,其後踢過布力般流浪及曼城女足,4年前重返曼聯,為「紅魔女足」上陣103場入41球,踢國家隊入球率更高,14次上陣有11球進帳。
據悉艾娜東妮自細已經視C朗為偶像,但之後「移情別戀」鍾意模仿般奴費南迪斯踢法。由於艾娜東妮表現出色,獲得曼聯開出長約綁實佢至2025年,奠定「女紅魔」王牌地位。
艾娜東妮
年齡:22
國籍:英格蘭
球會:曼聯
位置:前鋒
阿歷絲堅活英軍全能戰士
講到吸引球迷眼球,又點少得粉絲數以十萬計嘅靚女球星阿歷絲堅活,呢位人氣強勁嘅球星技術全面,可以勝任中堅同左後衞,「全能戰士」出道12年以來,曾經效力三大英格蘭豪門利物浦、曼聯、曼城,亦踢過歐洲女足班霸里昂,大戰經驗豐富,最威水一定係協助里昂奪得2019/2020年球季女子歐聯冠軍。
阿歷絲堅活兩年前加盟曼城,隨即為球隊捧女子英足盃冠軍,早前再贏埋英聯盃,天生王者之命。
阿歷絲堅活
年齡:28
國籍:英格蘭
球會:曼城
位置:後衞
英格蘭女足弗到漏
單睇歷史,德國女足無疑係最強,近10屆女子歐國盃8度封后(連同西德),不過佢哋上屆竟然喺8強止步,今年出戰6仗更有3次落敗,不宜高估。
荷蘭女足、西班牙女足及法國女足實力亦強勁,不過英格蘭女足更值得留意,佢哋近3屆女子歐國盃兩次殺入4強,水準不斷提升,尤其係自從主帥莎蓮娜韋雯於2021年領軍後,14仗豪取12勝2和不敗佳績,齋計近6仗全部贏晒,包括擊敗勁旅德國女足及荷蘭女足,盡顯霸氣,唔好忘記,莎蓮娜韋雯正係上屆率領荷蘭女足首度稱霸歐洲嘅教頭,英軍又有兩大前鋒羅倫夏普、艾倫韋特壓陣,加上今屆有主場之利,絕對係奪冠好時機。
近10屆女子歐國盃冠軍
年份 冠軍
2017 荷蘭女足
2013 德國女足
2009 德國女足
2005 德國女足
2001 德國女足
1997 德國女足
1995 德國女足
1993 挪威女足
1991 德國女足
1989 西德女足