左揀右揀　連格都係揀番韋斯咸

最強博彩盤路過關神器《串績王》：http://win.on.cc/football/　

今夏離開曼聯回復自由身嘅連格，近日受到多間英超球會斟介，踢邊隊任佢揀，傳媒爆料連格即將作出決定，佢希望加入一支有穩定上陣機會嘅球隊，透過表現爭取入選英格蘭世界盃大軍，因此好大機會揀返韋斯咸。

過去一個月，連格收到多間球會報價，計有愛華頓、熱刺同紐卡素，其中愛華頓承諾給予領袖地位，熱刺則不惜放棄重召基斯甸艾歷臣，都想簽佢，紐卡素正大肆擴軍，連格成為目標。

不過連格覺得，最穩陣都係韋斯咸，因為有成功經驗，去年初連格曾以借將身份加盟韋斯咸半季，喺莫耶斯麾下，佢上陣16場入9球交出5助攻，並得以短暫重返英格蘭國家隊。連格最大目標係出席世界盃，佢認為重返韋斯咸係最佳選擇。