天價薪酬！史達寧上「車」即將官宣

最強博彩盤路過關神器《串績王》：http://win.on.cc/football/　

英國各大傳媒報道，車路士已經同曼城翼鋒史達寧，達成個人待遇條款，呢位27歲英格蘭國腳同意上「車」，將可以獲得31.5萬鎊周薪，等完成手續之後，車路士就會公布史達寧加盟，至於曼城可獲4,500萬鎊轉會費收入。

據悉車路士領隊杜曹幾個星期之前，已經同史達寧進行深入對話，了解雙方意願同要求，史達寧好樂意上「車」，視車路士為自己事業更上一層樓嘅階梯。

車仔亦好闊綽向史達寧開出31.5萬鎊周薪合約，令佢成為隊內最高薪球員之一，亦將係球會易主之後，首位簽入嘅球員。

由於史達寧只剩下1年合約，曼城無法要求高價出售佢，預料只能收到4,500萬鎊轉會費。

車路士將會飛去美國訓集及踢熱身賽，史達寧趕唔切隨隊出發，但當完成轉會手續後，應該會前往美國同球隊會合。