曼聯兩巨頭現身巴塞　簽法蘭基迪莊好事近

足球博彩神器，每日重心提供盡在《彩報》：http://win.on.cc/football/　

曼聯大軍目前喺泰國進行季前集訓，不過行政總裁李察阿諾特同總監梅托，周二(12日)突然喺巴塞隆拿現身，目的當然係要完成收購法蘭基迪莊。曼聯上星期已同意用6,500萬歐元簽入呢位荷蘭中場，但由於巴塞隆拿仍拖欠佢約2,000萬歐元人工，令轉會陷入僵局，今次曼聯兩大巨星親自出動，預料將會突破性發展。

著名記者Gerard Romero公開李察阿諾特同梅托抵達巴塞隆拿嘅相片後，《曼徹斯特晚報》消息指兩巨頭同巴塞高層會面，證明巴塞會長拉波塔日前話「唔會賣」法蘭基迪莊並非事實，今次會面亦代表轉會談判仍然進行。法蘭基迪莊周一(11日)已返巴塞隆拿進行季前訓練，相信轉會結果好快就會出現。

曼聯領隊坦哈格周一喺泰國嘅記者會，亦再次強調收購新中場嘅必要性：「喺我上任第一個記者會，已經講明最大目標係要簽中場，同埋前鋒球員，我哋依家仲努力緊。一個球季好漫長，加上仲有世界盃喺中間，所以我哋比正常球季需要更多嘅球員。」