利物浦出手　再簽多1位「紐尼斯」

最強博彩盤路過關神器《串績王》：http://win.on.cc/football/　

利物浦今夏繼以破球會紀錄8,500萬鎊收購賓菲加前鋒達雲紐尼斯之後，準備再出手簽多1位「紐尼斯」。英國傳媒指紅軍睇中士砵亭中場馬菲奧斯紐尼斯，並已經接觸呢位23歲葡萄牙國腳嘅代表，有望以3,380萬鎊將佢收歸旗下。

利物浦主帥高普認為球隊仍然有需要增兵，提升爭逐各大錦標嘅本錢，鋒線人腳已經充裕，嚟緊重點將會簽入中場。

收購目標馬菲奧斯紐尼斯踢法攻守兼備，佢喺上季葡超入3球及2次助攻，平均每場有1.3次攔截。馬菲奧斯紐尼斯最擅於長傳，佢由後半場長傳上前場畀隊友嘅成功率高達92%，加上盤球迅速非常快，可以話係1位中場全能戰士。

若然利物浦簽到馬菲奧斯紐尼斯，加上達雲紐尼斯，兩位「紐尼斯」合作，肯定好有睇頭。曼城、巴黎聖日耳門都有興趣收購馬菲奧斯紐尼斯，紅軍想獲得呢位猛將加盟，出手就要快。