坦哈格大讚！曼聯「黃金右路」有定案

足球博彩神器，每日重心提供盡在《彩報》：http://win.on.cc/football/　

曼聯右翼問題困擾多年，不過新領隊坦哈格似乎已迅速搵到出路，球隊目前2場熱身賽，都係用達洛治同查頓辛祖呢對右路組合，而且表現仲相當對辦，坦哈格亦大讚兩人喺右路威脅力大，似乎呢對組合將可穩佔正選席位。

曼聯首場熱身賽大勝利物浦4比0，出任右翼嘅查頓辛祖表現突出兼有波入，上場4比1大勝墨爾本勝利，達洛治右路傳中亦造就安東尼馬迪爾建功，呢位葡萄牙右閘依家已壓倒雲比沙卡成為正選，佢同查頓辛祖嘅化學作用亦獲坦哈格大讚。

坦哈格喺贏墨爾本勝利後表示：「勝利嘅防守好嚴密，我哋左閘攻勢唔係太成功，但係右面就製造咗4至5次非常好嘅機會。成條右路都好出色，查頓辛祖同達洛治聯繫得好好，加上麥湯米尼、安東尼馬迪爾同般奴費南迪斯幫手，但球隊仍要進步，將兩邊攻勢平衡。」

曼聯星期二(19日)下午會再度出擊，喺墨爾本對住英超球隊水晶宮，達洛治同查頓辛祖有望繼續保住正選位置。