不老戰神　40歲伊巴謙莫域續約1年

最強博彩盤路過關神器《串績王》：http://win.on.cc/football/　

意甲冠軍AC米蘭宣布同伊巴謙莫域續約至2023年6月，意味呢位40歲瑞典神鋒起碼會再踢多1季，但由於伊巴謙莫域因養長抖，可能要等到明年1月，先至有機會復出。

AC米蘭喺官網公布消息：「好高興同伊巴謙莫域達成協議，佢已經續約至2023年6月30日，並會繼續着11號球衣。」據悉伊巴謙莫域只收取100萬至150萬歐元年薪，另外根據入波、助陣等數字發放獎金。

伊巴謙莫域兩度效力AC米蘭，包括協助球隊奪得2010/11年意甲冠軍，佢2020年初重返「紅黑兵團」，並於上季率領球隊相隔11年再嘗聯賽冠軍滋味。

伊巴謙莫域上季受傷患問題困擾，上陣27場僅入8球，原本盛傳佢協助AC米蘭奪得意甲冠軍之後，就會退休，但佢似乎唔認老，決定再踢多1季。