夏蘭特首戰一箭定江山　曼城擊敗拜仁

最強博彩盤路過關神器《串績王》：http://win.on.cc/football/　

今夏強勢加盟曼城嘅艾寧夏蘭特首次為「藍月亮」披甲，就入波成為贏波功臣，協助球隊喺周日(24日)早上熱身賽以1比0擊敗拜仁慕尼黑，夏蘭特迅速發威，曼城新一季如虎添翼。

曼城美國之旅上仗以2比1擊出CF阿美利加，艾寧夏蘭特並冇上陣，令唔少球迷感到失望。「藍月亮」領隊哥迪奧拿終於識做，今仗派出呢位22歲挪威神鋒擔任正選。

開賽12分鐘，曼城就打開紀錄，基亞利殊禁區左路傳中，艾寧夏蘭特飛身近門剷入，佢今仗第1次起腳就入波，盡顯射手觸覺。

艾寧夏蘭特入波冇幾耐，因為落傾盤大雨，導致比賽一度暫停，其後再開波，夏蘭特表現仍然勇猛，包括1次撞射貼柱出界，並於40分鐘再次射門入網，但因為傳波嘅貝拿度施華越位在先，導致夏蘭特慘食詐胡。

其後艾寧夏蘭特被換離場，曼城亦再冇波入，維持贏1比0完場。值得一提，艾寧夏蘭特之前效力多蒙特，7次對拜仁慕尼黑，都輸波收場，加盟曼城首仗再遇「宿敵」，立即嘗到贏波滋味，的確係一個好開始。