咁都得？曼聯「折衷方案」解決C朗問題

最強博彩盤路過關神器《串績王》：http://win.on.cc/football/　

曼聯球星C朗去向眾說紛紜，雖然佢本人想離隊，但紅魔鬼卻拒絕出售，英國傳媒指會方準備提出「折衷方案」，就係先同C朗續約，再將佢外借去「歐聯球隊」，令佢可以繼續參加呢項大賽，等曼聯下季獲得歐聯入場券後，屆時C朗應該會樂意再為紅魔鬼披甲。

據悉曼聯教練團開始覺得強留C朗，唔會有幸福，因為新帥坦哈格近期熱身賽已經制定冇C朗嘅戰術，效果相當唔錯，佢歸隊反而會影響部署，又要重新改變踢法。

加上C朗唔見人呢段日子，曼聯內部和諧好多，一旦佢回歸，隨時會破壞氣氛。

不過，基於商業原因，贊助商要求曼聯唔好出售C朗，加上其他大球會亦唔多願意以高薪簽入呢位葡萄牙國腳。英國《鏡報》指曼聯有意同C朗續約，以滿足贊助商要求，同時將佢外借去有份踢歐聯嘅球隊，幫C朗達成心願。

曼聯只要新一季奪得歐聯資格，明夏再收回C朗，佢到時應該會專注為紅魔鬼搏殺。