傳法蘭基迪莊答應減薪　留巴塞改踢中堅？

最強博彩盤路過關神器《串績王》：http://win.on.cc/football/　

法蘭基迪莊轉會風波再有新發展，據西班牙傳媒報道，巴塞隆拿教練沙維同法蘭基迪莊會面後，就留隊方案有「滿意進展」，傳聞呢位荷蘭國腳將同意減薪50%，而沙維更表示新球季考慮將法蘭基迪莊轉去踢中堅！

西班牙《阿斯報》報道，沙維同法蘭基迪莊喺美國進行會面，沙維向佢解釋球隊處境，表明個人希望法蘭基迪莊留低，但如果要巴塞成功留人，法蘭基迪莊就要答應減薪50%，報道指會議結束後，雙方都覺得「滿意」，令留隊機會大大增加。

法蘭基迪莊近期為巴塞踢熱身賽，後備上陣都係踢中堅，有傳沙維係故意唔畀佢踢中場，沙維就否認：「我冇諗過咁做(逼走法蘭基迪莊)，我好鍾意佢，佢喺中堅位可以為球隊帶嚟貢獻，我幾鍾意佢踢呢個位置。」

事實上，法蘭基迪莊喺阿積士有一段時間拍住馬菲斯迪歷特踢雙中堅，喺朗奴高文執教巴塞隆拿期間，亦曾經客串踢3中堅入面嘅自由人，所以佢對中堅位置並唔陌生。