艾朗藍斯被炒痛失「肥約」　有3條出路

足球博彩神器，每日重心提供盡在《彩報》：http://win.on.cc/football/　

意甲勁旅祖雲達斯宣布，同中場艾朗藍斯解約，呢位31歲威爾斯國腳可以自由身轉會，美職、土超都可能係佢下一站落腳地，但肯定搵唔番效力祖記嘅40萬鎊周薪肥約。

祖雲達斯透過官方社交網，用簡單13個字公布已經同艾朗藍斯解約，結束雙方3年賓主關係。綽號「死神」嘅艾朗藍斯2019年夏天以自由身，從阿仙奴轉投祖雲達斯，由於免轉會費，祖記當年大方向佢開出40萬鎊周薪肥約。

不過，艾朗藍斯效力祖記期間表現欠佳，大部份時間擔任後備，今年1月更被外借去蘇超球隊格拉斯哥流浪，可見教練阿里基早已經放棄佢。

值得一提，艾朗藍斯早前喺祖雲達斯基地，為球迷簽名期間，有人拎1張用意大利文寫住「解除合約」嘅紙畀佢簽名，艾朗藍斯都照簽，依家真係成為事實。

據悉土耳其球隊加拉塔沙雷有興趣簽艾朗藍斯，佢亦有可能加盟美職球隊FC洛杉磯，同威爾斯國家隊隊友加里夫巴利拍住上，仲有1個選擇係轉投意甲新升班球隊蒙沙。