C朗要求解約　拒絕「罷工」最快周日上陣

足球博彩神器，每日重心提供盡在《彩報》：http://win.on.cc/football/　

C朗拿度返曼聯報到報，周二(26日)聯同經理人佐治文迪斯同領隊坦哈格等曼聯高層「攤牌」。據英國《每日郵報》報道，雙方嘅立場都冇改變，曼聯仍然指C朗係「非賣品」，目前亦冇收到任何報價，而C朗就堅持要求轉會，更加向曼聯提出解約要求，令佢可以自由轉會。

《每日郵報》消息指，90分鐘嘅會面並冇影響到雙方立場，C朗仍然希望可以成功轉會，但佢亦知道能夠提供合適財政計劃嘅球會唔多，所以C朗要求提前1年將佢份36萬鎊周薪合約取消，以自由轉會嚟提升吸引力，呢位37歲老將早前亦表示願意減薪3成。

報道指C朗喺未實現轉會目標前，會以「專業態度」繼續履行合約，包括操練同上陣比賽，消息指曼聯周日(31日)對華歷簡奴嘅熱身賽，預料會派出副選同青年軍球員上陣，啱啱展開單獨操練嘅C朗有機會喺呢場上陣提升狀態。