羅拔佬踢3場都食白果　巴塞後悔未？

最強博彩盤路過關神器《串績王》：http://win.on.cc/football/　

巴塞隆拿喺周日(31日)早上熱身賽，憑奧士文尼迪比利、迪比各入1球，以2比0擊敗紐約紅牛，以4戰取得3勝1和成績，結束美國之旅集訓。

巴塞整體表現唔錯，惟獨新加盟前鋒羅拔利雲度夫斯基演出令人失望，上陣3場都冇波入，巴塞幾經波折，先至簽到呢位波蘭射手，隨時係入錯貨。

羅拔利雲度夫斯基為巴塞踢3場熱身賽，都係正選上陣，今場更加踢咗73分鐘，但仍然食白果。最諷刺係後備入替「羅拔佬」嘅迪比，只係用咗14分鐘就入波，令呢位新隊友更難堪。

巴塞隆拿經過3次報價，豪花5,000萬歐元向拜仁慕尼黑收購羅拔利雲度夫斯基，而「羅拔佬」為咗加盟巴塞，亦同拜仁搞到反晒面，但轉會成功之後，卻交唔出功課，佢同巴塞變「雙輸」，拜仁成為大贏家，即使出售咗「羅拔佬」，一樣喺德超盃贏波捧盃。

相比羅拔利雲度夫斯基斯人獨憔悴，奧士文尼迪比利就意氣風發，近4場熱身賽入4球，證明巴塞同佢續約非常正確。