C朗復出恥辱式收場 發脾氣提早走人

2022年08月01日 08:01
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
相隔85日,C朗終於喺周日(7月31日)晚熱身賽,再次為曼聯上陣,主場出戰華歷簡奴,但呢位37歲葡萄牙球星表現強差人意,成為紅魔鬼今仗唯一一位踢完上半場就被換走嘅球員,對於呢位球王而言,絕對係奇恥大辱。
C朗可能因此而發脾氣,比賽未結束已經提早走人,經此一役後,相信C朗轉會可能性將進一步升溫。
由於曼聯早1日先至同馬體會踢熱身賽,所以今仗陣容大輪換,正選之中得C朗同華拉尼係常規主力,2位新兵基斯甸艾歷臣、利辛度馬天尼斯都擔正。
主角C朗因不滿曼聯無緣來屆歐聯,要求轉會,已缺席曼聯開操後首5場熱身賽,直至今仗開咧前最後1場熱身賽,先至披甲。不過,C朗久疏戰陣,狀態明顯不足,僅於開賽12分鐘有1次射門,但唔中目標。
曼聯主帥坦哈格趁「飲水時間」講解戰術,C朗更加表現得不耐煩,上半場兩隊互無紀錄,半場休息後,C朗已經被換離場,令呢位射手最尷尬嘅事係入替佢嘅阿密特迪亞路,上陣3分鐘就入波,為曼聯打開紀錄。
9分鐘之後,華歷簡奴憑艾華路加西亞建功扳平1比1,曼聯近3場熱身賽僅獲得2和1負,冇晒早前3連勝嘅銳氣。
相比賽果,C朗一舉一動更加受注目,有人喺完場前10分鐘,影到佢已經離開球場,未知有冇獲得主帥坦哈格批准,但從C朗冇同球隊共同進退,已反映佢同曼聯嘅關係跌至新低點,離隊似乎已成定局。