C朗轉會死線曝光　或無緣英超開鑼戰

最強博彩盤路過關神器《串績王》：http://win.on.cc/football/　

西班牙《阿斯報》著名記者塞恩斯爆料，指曼聯球星C朗希望喺8月7日曼聯出戰今季首場英超之前轉會，時間非常緊迫，加上呢位37歲葡萄牙國腳剛復操冇幾耐，狀態仍然不足，就算留隊，預料領隊坦哈格都唔會派佢踢8月7日曼聯主場對白禮頓。

由於塞恩斯同C朗係老友，佢爆出嘅猛料應該幾堅，但由於多間大球會已經表現唔會簽入C朗，令佢喺8月7日之前「脫魔」嘅可能性愈來愈低。

以目前情況睇，如果C朗堅持離開曼聯，最大機會簽入佢嘅球隊得番士砵亭同拿玻里，兩隊都有份參加今屆歐聯，應該滿足到C朗要求，其中拿玻里希望簽入C朗，主因係想為球會再塑造一位類似馬納當拿嘅英雄人物。