利物浦貪新不忘舊　祖達獲加薪續約5年

足球博彩神器，每日重心提供盡在《彩報》：http://win.on.cc/football/　

利物浦今年重整鋒線，1月先有路爾斯戴亞斯加盟，今夏又重金簽入達雲紐尼斯，加上王牌射手穆罕默德沙拿續約，呢條鋒線無疑極有睇頭。不過，上季表現突出嘅迪亞高祖達並冇被遺忘，利物浦周二(2日)宣布已同呢位葡萄牙前鋒續約5年，加人工獎勵佢嘅優異表現。

25歲嘅迪亞高祖達2年前由狼隊加盟利物浦，演出穩步上揚，上季英超有15個入球，雖然佢同利物浦仲有3年合約，但領隊高普視佢為未來計劃核心成員，所以提前同佢續約5年，迪亞高祖達表示：「好榮幸可以續約，呢張合約證明球會對我好有信心。」

迪亞高祖達目前周薪係9萬鎊，遠低於穆罕默德沙拿新約嘅40萬鎊周薪，報道指新合約肯定會大幅提升薪酬，目前利物浦政策係以「重獎金」形式出糧，部份薪酬會以豐厚獎金形式支付。迪亞高祖達目前仍然養傷，預計仲要數個星期先可以復出。