【官宣】舒米高投尼斯　11年李城童話結束

最強博彩盤路過關神器《串績王》：http://win.on.cc/football/　

2016年協助李斯特城「童話式」捧英超冠軍嘅門將卡斯柏舒米高，周四(4日)宣布轉投法甲球會尼斯，結束長達11年嘅「狐狸」生涯。35歲嘅卡斯柏舒米高係曼聯傳奇舒米高個仔，兩父子都係丹麥國腳兼英超冠軍球員，今次轉戰法甲簽約3年，可能係佢足球生涯最後一站。

李斯特城聲明表示：「效力球會11年後，卡斯柏舒米高決定轉投尼斯，結束佢喺李斯特城嘅神奇之旅。」卡斯柏舒米高喺曼城青年軍出身，之後踢過諾士郡、列斯聯等球隊，2011年加盟李斯特城後愈踢愈好，幫球隊贏過英超、英足盃同社區盾冠軍，11年間為球隊上陣479場比賽。

卡斯柏舒米高係2018年班主維猜直升機意外嘅目擊者，當日係比賽後1個鐘頭，好多球員都離開咗王權球場，但舒米高當時仲未走，因為佢帶住由丹麥過嚟睇自己比賽嘅家人行咗球場一個圈，睇住直升機喺球場起飛，臨走時仲同維猜揮手講拜拜，目賭整個悲劇過程。

卡斯柏舒米高喺twitter拍片道別：「經過11個神奇球季，我作出離開呢個艱難決定，李斯特城對我嚟講唔止係一間球會，係我認識畢生好友所有回憶嘅家。」

尼斯今季會出戰歐霸盃賽事，佢哋日前已宣布簽入自由身嘅艾朗藍斯，志切增強實力。李斯特城放走卡斯柏舒米高後，表示唔會收購新門將作為替補，領隊羅渣士證明2號門將丹尼禾特將會成為正選。