馬迪爾受傷抖2星期 坦哈格「焗用」C朗

2022年08月05日 08:01
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
曼聯喺周日(7日)英超開咧戰對白禮頓前受打擊,季前熱身狀態大勇嘅前鋒安東尼馬迪爾,因大腿受傷將缺陣約2個星期,令「轉會風波」主角C朗拿度可能要臨危受命。C朗被領隊坦哈格公開批評後,周四(4日)繼續跟大隊練習,坦哈格或「焗用」C朗掛帥,排陣決定受到關注。
喺季前熱身入3球嘅安東尼馬迪爾,原本係曼聯開季嘅箭頭正選大熱,不過坦哈格賽前證實呢位法國前鋒受傷,據報佢喺上星期對馬德里體育會熱身賽傷出後,檢查證實大腿有傷,開鑼戰對白禮頓肯定缺陣,呢種傷患一般抖2個星期左右,目標係趕及第2周作客賓福特復出。
據英國傳媒報道,坦哈格正考慮係咪對C朗臨危受命,呢位前鋒夏天只係踢過半場熱身賽,而且坦哈格日前先公開批評佢破壞團結行為「不能接受」,不過C朗喺周四練習就強勢回歸,跟大隊操練後即喺社交網貼相留言:「按部就班」,暗示自己可以候命。
由於卡雲尼離隊同格連活特仍被停賽,曼聯夏天收購達雲紐尼斯失敗後,亦未有再簽入其他代替者,坦哈格可用前鋒所剩無幾。如果坦哈格決定繼續將C朗擺後備,最大機會係用拉舒福特出任箭頭,兩翼就用查頓辛祖同艾蘭加。