【官宣】車仔終贏巴塞　艾斯派古達續約2年

最強博彩盤路過關神器《串績王》：http://win.on.cc/football/　

車路士今個夏天轉會窗畀巴塞隆拿「撳住打」，收購拉芬夏比洛尼同祖利斯古迪都喺臨門一腳被搶走，不過車仔終於都贏返一仗，周五(5日)宣布同後防老將艾斯派古達續約2年，粉碎佢會轉投巴塞隆拿嘅傳聞。

艾斯派古達一直係巴塞隆拿獵物，呢位32歲隊長亦希望過檔，不過巴塞只肯出價300萬歐元，被車仔一口拒絕，雙方一直僵持之下，車路士最終成功氹到艾斯派古達續約。艾斯派古達表示：「好開心可以繼續留效車路士，呢度係我屋企，我已經加盟差唔多10年，深深感受到球迷嘅愛戴，好興奮可以參與球會嘅全新大計。」

成功續約艾斯派古達後，車路士收購後防球員嘅壓力將減輕，據報球隊已接近用6,200萬鎊收購白禮頓左閘古古列拿，成事後會全力收購李斯特城中堅韋斯利科芬拿。至於另一左閘馬高斯阿朗素，盛傳亦係巴塞隆拿目標人物。