車路士贏波代價大 新中堅受傷

2022年08月07日 08:01
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
周日(7日)凌晨英超,車路士憑佐真奴射入12碼,作客以1比0擊敗愛華頓,但贏波亦付出沉重代價,身價達3,300萬鎊嘅新加盟中堅高列巴尼傷出。至於對手愛華頓更加有2位後衞賓葛菲特、耶利文拿受傷,對雙方而言絕對係1場慘烈惡鬥。
車路士今夏豪花超過1.6億鎊增兵,其中2位新兵史達寧、高列巴尼今仗都以正選上陣,並反客為主強攻對手,愛華頓一時難以招架,後衞賓葛菲特喺開波18分鐘防守時,嚴重受傷需要用擔架抬離場,送院治療。
車路士繼續施壓,踢到43分鐘,尼高路簡迪禁區邊起腳,被愛華頓門將比克福特撲出,史達寧立即補射入網,但因為越位在先,被判無效。
戰至上半場補時,車仔終於打破缺口,芝維爾博到12碼,佐真奴主射入網。
換邊之後,愛華頓傾力反擊,但威脅有限,更有中堅耶利文拿傷出,其後車路士中堅高列巴尼亦同樣受傷。由於今場比賽多次因為球員受傷及看台上發生事故,導致上下半場合共補時長達18分鐘,最終車路士維持贏1比0完場。
賽後車路士領隊杜曹表示滿意球隊上半場表現,但下半場失太多控球權,補時太耐亦打亂部署,幸好仍然可以全取3分。