人生贏家！安察洛堤足球生涯第38冠！

足球博彩神器，每日重心提供盡在《彩報》：http://win.on.cc/football/　

皇家馬德里勇奪歐超盃，教練安察洛堤繼續改寫歷史，今次係佢歷來第4次贏得歐超盃，超越哥迪奧拿嘅3次冠軍紀錄。「肥安」上季已經成為首個贏晒5大聯賽(英超、西甲、德甲、意甲、法甲)冠軍教頭，亦係第1個4奪歐聯冠軍主帥，認真犀利！

安察洛堤之前已經帶領AC米蘭贏過2次歐超盃，2014年亦率領皇馬贏過1次，今屆第4次捧盃成功超越哥迪奧拿，要知道費格遜、施丹、沙基、尹戈爾、施蒙尼等名帥都只係拎過2次，就知道4奪歐超盃難度有幾大。

63歲嘅安察洛堤堪稱係人生贏家，佢由球員時代到執起教鞭，已經累積贏過38個大賽冠軍，包括球員時代14次冠軍同教練生涯24個冠軍。今場歐超盃當選MVP嘅卡斯米路賽後表示：「安察洛堤係足球傳奇，我衷心尊敬佢，佢已經63歲，但對冠軍嘅渴望同細路仔冇分別，呢個係皇馬嘅福氣。」