【官宣】賓福特簽「新艾歷臣」　即鬥曼聯

足球博彩神器，每日重心提供盡在《彩報》：http://win.on.cc/football/　

英超球會賓福特周三(10日)宣布，球隊由森多利亞簽入丹麥中場丹斯加特，據報轉會費為1,670萬鎊。呢位22歲新星喺丹麥國家隊被視為基斯甸艾歷臣接班人，今次加盟賓福特亦係取代艾歷臣嘅空缺，有趣嘅係，賓福特周日(14日)凌晨對曼聯，丹斯加特有機會即刻同艾歷臣交鋒！

丹斯加特同賓福特簽約5年後，成為隊中第6個丹麥球員，領隊法蘭基表示：「我認為丹斯加特係典型賓福特收購，非常年輕並充滿潛力，球會有能力幫佢達到最高水平，佢上季唔好彩受到傷患困擾，但我哋喺歐國盃同森多利亞都見到佢係好有才華。」

艾歷臣今夏由賓福特轉投曼聯，丹斯加特將會頂替佢嘅位置，事實上丹麥上年歐國盃期間，亦係由丹斯加特代替心臟問題暈倒球場嘅艾歷臣，而且表現非常突出。丹斯加特最快周日對曼聯可以上陣，有望同「師兄」艾歷臣大鬥法。