曼聯再受打擊 拉舒福特密謀轉投PSG

2022年08月12日 08:01
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
繼C朗之後,又有1位曼聯前鋒準備離隊,英國及法國傳媒爆料,指法甲冠軍巴黎聖日耳門(PSG)已經派人同拉舒福特嘅經理人接觸,力邀呢位24歲英格蘭國腳加盟。
由於拉舒福特現時合約剩下唔夠1年,加上PSG出手挖角,如果紅魔鬼想留住呢位青訓產品,可能需要開出超高薪合約,先至吸引到「福仔」續約。
早於今年3月已經傳出PSG有興趣簽入拉舒福特,加迪亞今夏成為新帥後,希望簽入1位活動範圍廣泛嘅前鋒,拉舒福特再次成為PSG收購目標。英國《每日郵報》指PSG嘅代表近日同拉舒福特嘅經理人喺巴黎見面,商討呢位前鋒入「門」嘅可能性。
不過,曼聯領隊坦哈格視拉舒福特為球隊骨幹人物,相信唔會放人,英國傳媒指「福仔」踏入續約關鍵時期,佢嘅經理人可能故意放料,向曼聯施壓,爭取最有利續約條件。根據雙方現時合約,曼聯有權自動同拉舒福特續約1年,所以短期內未必出手挽留佢。
事實上,拉舒福特近年表現欠佳,上季上陣32場僅入5球,今季首場英超對白禮頓,更頻頻浪費入球機會,唔少球迷認為既然PSG肯接貨,曼聯應該趁機出售拉舒福特,重建鋒線。