車仔第3次報價科芬拿　勢破馬古尼紀錄

足球博彩神器，每日重心提供盡在《彩報》：http://win.on.cc/football/　

車路士今夏一直追逐李斯特城中堅韋斯利科芬拿，但之前2次提出報價，都被「狐狸兵團」拒絕。英國《太陽報》指車仔將第3次報價，數額接近8,500萬鎊，打破3年前，李斯特城以8,000萬鎊將哈利馬古尼出售畀曼聯嘅紀錄，令韋斯利科芬拿成為史上最高身價後衞。

由於車仔今夏失去2位中堅魯迪格、安達斯基斯坦臣，領隊杜曹急需要補充新中堅，除咗已簽入高列巴尼之外，亦睇中現年21歲嘅韋斯利科芬拿。

據悉車路士之前分別提出6,000萬鎊及7,000萬鎊收購呢位法國新星，但李斯特城都不為所動，所以車仔準備加碼至近8,500萬鎊。

李斯特城領隊羅渣士表示，唔知道車仔最新報價，並強調無意出售韋斯利科芬拿，似乎暗示仲想車仔再加碼。

身高1米90嘅韋斯利科芬拿2年前由聖伊天加盟李斯特城，當時轉會費僅3,650萬鎊，佢上季曾經受重傷，休息超過半年，車路士仍然願意出天價收購科芬拿，似乎比較冒險。