謝四壓林伯 雙特大戰維拉嗒拖肥

2022年08月13日 21:29
東網電視
更多新聞短片
(Getty Images)
足球博彩神器,每日重心提供盡在《彩報》:http://win.on.cc/football/ 
英超周六(13日)早場雙特大戰,阿士東維拉主場迎戰「拖肥」愛華頓,兩位前英格蘭中場領軍交鋒,結果謝拉特率領嘅維拉,憑丹尼艾格斯開紀錄,貝安迪亞建功,以2比1擊敗林柏特領軍嘅愛華頓,打開勝利之門,謝四開香檳,愛華頓開季吞下兩連敗,林伯擰晒頭。
維拉強陣出擊,丹尼艾格斯拍奧尼屈堅斯雙箭頭,菲臘比古天奴中場支援,愛華頓亦擺出三箭頭全攻型陣式,杜韋麥尼爾、安東尼哥頓拍迪馬雷格雷,實行鬥攻。24分鐘,愛華頓一度攻破對方大門,安東尼哥頓門前大腳轟入,可惜越位在先被判詐胡。31分鐘維拉由守轉攻,奧尼屈堅斯右路停定傳中,丹尼艾格斯中路接應轉身勁射破網成1比0。
愛華頓似乎黑氣纏身,繼上仗賓葛菲特受傷,今仗又有杜哥利早段傷出,下半場調動,亦只能換入荷西朗頓,場上形勢亦陷於被動,林柏特都冇晒符。謝拉特就唔同你急,領先下穩住勝局,尾段換入里安拜尼打突擊,86分鐘貝安迪亞接應奧尼屈堅斯妙傳建功成2比0,轉頭佢哋嘅盧卡斯迪治尼擺老烏,幫愛華頓「破蛋」追成1比2完場。