曼城談笑用兵　4比0大炒般尼茅夫

足球博彩神器，每日重心提供盡在《彩報》：http://win.on.cc/football/　

周六晚(13日)英超激戰，曼城主場迎戰升班球隊般尼茅夫，今場奇雲迪布尼同菲爾科頓做主角，兩位攻擊手各交出1傳1射，包括迪布尼一記右腳腳面死角靚波，協助「藍月亮」4比0大勝對手，兩戰兩勝升上榜首。

曼城今仗陣容微調，由馬列斯取代基亞利殊踢正選，其餘位置不變，般尼茅夫亦以賴恩基士堤取代蘇蘭基，單箭頭繼續係基化摩亞。艾寧夏蘭特上仗幫曼城入兩粒，今場個個驚咗佢，但佢今場主要做牽制角色，19分鐘交出助攻，由根度簡入楔埋門先開紀錄。

31分鐘菲爾科頓送交奇雲迪布尼，去到射程範圍假身一擺再扮傳波，其實係右腳腳面射死角網仔收死對方門將卓華斯，曼城贏到2比0，轉頭迪布尼報恩，靚交菲爾科頓埋門射成3比0完半場。

下半場曼城陸續換出主力，夏蘭特亦於74分鐘鳴金收兵，但踢到79分鐘曼城又入波，祖奧簡斯路左路底線傳中，謝法臣拿馬擺老烏，曼城贏到4比0完場。