曼聯唔使愁　阿仙奴上季都開咧3連敗啦

最強博彩盤路過關神器《串績王》：http://win.on.cc/football/　

曼聯今季英超2戰2敗，上場更慘吞賓福特4蛋，令人嘩然，紅魔鬼球迷灰晒，講到好似世界末日，花生友更加趁機踩多腳，寸曼聯會降班。不過，現實上又未必咁差，例如阿仙奴上季英超頭3場輸晒，失9球兼冇波入，但最後以第5位過終點，僅落後第4位熱刺2分，幾乎重奪歐聯資格，所以話世事無絕對。

事實上，曼聯對上1次英超開季2連敗，正係1992/93年度球季，紅魔鬼該季最終更奪得冠軍。至於「後費格遜時代」，曼聯曾於2014/15年球季首3場聯賽不勝，該季最後都排第4位，所以就算曼聯下仗輸埋畀利物浦，亦冇乜大不了，畢竟一季英超有38輪要踢，仲有大把時間追。

特別係季初輸得大大鑊，曼聯管理層開始識驚，勢必大開水喉增兵，會方能否把握8月餘下時間簽入合適球員，打造一支有士氣、有信心嘅球隊，先至係球季成敗關鍵，至於輸一兩波，影響並唔大。