麥迪比都傷埋 利物浦大鬧中堅荒

2022年08月14日 23:05
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
利物浦傷兵問題惡化,中堅祖爾麥迪比喺操練時受傷,可能缺陣周二(16日)凌晨英超主場對水晶宮。由於紅軍另1位中堅伊巴希馬干拿迪正在養傷,意味好可能要由冇踢中堅多時嘅祖高美斯重操故業,同華基爾雲迪積克扼守中路。
英國傳媒指祖爾麥迪比喺上周五(12日)操練期間,感到不適,提早退出操練。據悉呢位31歲喀麥隆後衞疑似腹股溝受傷,未必可以趕及復出對水晶宮。
睇番利物浦傷兵情況,的確非常嚴重,前鋒迪亞高祖達、中場堤亞高艾簡達拿、居迪斯鍾斯、阿歷士張伯倫、中堅伊巴希馬干拿迪、後備門將基利靴都有傷在身,祖爾麥迪比依家亦成為「十字兵」。
如果祖爾麥迪比無法上陣對水晶宮,利物浦領隊高普可能會安排祖高美斯踢中堅,呢位25歲英格蘭國腳雖然踢中堅出身,但因為表現欠穩,近年多數踢右閘,加上長居後備,若然由佢擔正,實在難以令人放心,紅軍只能自求多福。