曼聯買前鋒漁翁撒網 4大捕獵名單曝光

2022年08月17日 08:01
東網電視
更多新聞短片
最強博彩盤路過關神器《串績王》:http://win.on.cc/football/ 
曼聯喺英超開季2連敗後,球會已進入緊急狀態,據報「紅魔鬼」決心喺轉會窗完結前引入頂級中場同前鋒,而且展開漁翁撒網式嘅搜獵行動,《The Athletic》同《ESPN》等媒體更將4大前鋒目標名單曝光,當中包括奧巴美揚、占美華迪、魯爾杜馬斯同馬菲奧斯根夏。
曼聯前鋒位置人丁單薄,只有要求轉會嘅C朗拿度同安東尼馬迪爾可以選擇,領隊坦哈格原本想簽阿拿奧杜域,又因球迷強烈反對而放棄。為確保夏季轉會窗最後2個星期內簽到前鋒,據報曼聯依家漁翁撒網向多人埋手,希望至少有一單可以成事。
《The Athletic》報道,曼聯嘅目標名單驚現李斯特城前鋒占美華迪個名,呢位前鋒雖然已經35歲,但對上2季分別都有15個聯賽入球,曼聯考慮向佢開出1年合約。報道指李斯特城領隊羅渣士唔想放人,不過球會目前財政出現問題,或會令曼聯有機可乘。
另外,上季西甲射手榜排第3位嘅魯爾杜馬斯亦榜上有名,呢位西班牙前鋒合約有6,000萬鎊買斷條款,不過曼聯有信心用一半價錢就可以說服愛斯賓奴放人。至於《ESPN》報道,曼聯準備同車路士拗手瓜,加入爭奪巴塞隆拿前鋒奧巴美揚,同時會向馬體會前鋒馬菲奧斯根夏埋手,預計轉會費達4,200萬鎊。