麥總尼馬糾紛 拉莫斯做和事佬

2022年08月17日 23:05
東網電視
更多新聞短片
沙治奧拉莫斯做調解員
足球博彩神器,每日重心提供盡在《彩報》:http://win.on.cc/football/ 
基利安麥巴比同尼馬今季矛盾不斷,上仗法甲巴黎聖日耳門對蒙彼利埃出現爭射12碼糾紛,成為球迷談論對象,賽後兩人矛盾未有緩解迹象,尼馬更被發現喺嘲調麥巴比嘅社交帖文點讚,PSG內部召開會議後得出解決方案,就係搵一位具份量中間人調解,而呢個人選,就係沙治奧拉莫斯。
自從麥巴比續約後,傳聞佢操球隊生殺大權,故被稱為「麥總」,有傳佢打算今夏踢走合作咗5年嘅尼馬,令兩人關係破裂,不過尼馬亦非省油的燈,拒絕離隊後今季大打爭氣波,先捧法冠盃,法甲開季頭兩輪攻入3球,打破球會44年紀錄,猶如向麥總打面。
麥總上仗對蒙彼利埃先射失12碼,又被鏡頭影到不滿隊友唔傳波畀佢而放棄進攻,下半場博到第2個12碼又向尼馬爭射,但遭尼馬拒絕,全場身體語言表達嘅不滿路人皆見,而佢同尼馬嘅矛盾更係一地花生。
PSG見兩位巨星咁落去唔係辦法,開會後決定派出調解員協調,希望兩位合作咗5年嘅大哥和好如初,而調解員人選就係沙治奧拉莫斯,論資歷、奪冠數量同球壇地位,拉莫斯都係全隊之冠,而且同兩人都冇私交,可以中立同客觀地調解雙方矛盾,係最理想人選。
經拉莫斯調解後,現時情況已有改善,麥巴比阿媽Fayza LAmari受訪時表示:「情況已得到球會內部處理,一切都好。」