拿比基達突要求轉會 利物浦緊急簽人

20220819
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
英超開季連續2場失分嘅利物浦,「雙紅會」前出現突發事件,據報中場拿比基達要求轉會,或喺今個轉會窗重返RB萊比錫,令原本已經鬧中場荒嘅利物浦大失預算。消息指「紅軍」已緊急物色替補人選,白禮頓中場新星摩西斯卡些度獲高普垂青,或成利物浦救星。
德國《天空體育》報道,畿內亞國腳拿比基達對自己喺利物浦嘅發展並唔滿意,同球會嘅續約談判亦已停止,呢位27歲球星更希望喺今個夏天轉會。由於拿比基達依家張合約到季尾就完結,利物浦唔想人財兩失嘅話,一係就說服佢續約、一係就立即將佢賣走,《每日郵報》指前球會RB萊比錫已表明有意回購拿比基達。
利物浦本身中場人腳唔算充足,而且堤亞高艾簡達拿開咧重傷,加入阿歷士張伯倫、居迪斯鍾斯嘅「十字軍」名單,兵源更加捉襟見肘。雖然利物浦曾講明今夏轉會工作已經結束,但高普喺月初就曾暗示有突發事件,將會再次出手:「我哋嘅轉會已經結束,如果冇人離隊或者嚴重受傷嘅話......」
利物浦原本打算明年全力收購多蒙特中場祖迪比寧咸,但拿比基達潛在轉會令球隊重新部署,據《90min》報道,「紅軍」睇中白禮頓新星摩西斯卡些度,呢位20歲厄瓜多爾國腳有唔少豪門垂青,白禮頓視佢嘅價值同賓韋特、古古列拿相約,意味叫價可能達5,000萬鎊以上,而效力錫菲聯嘅挪威中場辛達貝治就係Plan B,佢嘅轉會費只需1,500萬鎊左右。