杜曹被罰停賽1場　扯頭髮事件甸恩認錯

英格蘭足總周五(19日)宣布，車路士領隊杜曹同熱刺領隊干地上輪聯賽衝突，因行為不檢要接受處分，杜曹被罰停賽1場，而干地就「走得甩」只係罰款了事。至於VAR球證甸恩就承認對基斯甸羅美路「扯頭髮」事件處理出錯。

上星期「倫敦打吡」火藥味濃，杜曹同干地兩度「埋牙」，熱刺追平1比1後兩人出現爭執，到完場後更「握手變講手」，齊齊被球證驅逐。英足總周五宣布，杜曹被罰款35,000鎊同停賽1場，不過因程序問題，停賽唔會喺周日(21日)對列斯聯執行，杜曹會喺下輪李斯特城先至服刑；至於干地就被罰款15,000鎊，但唔使停賽。

呢場賽事球證執法出現唔少爭議，包括基斯甸羅美路粗暴扯古古列拿頭髮，造就熱刺補時追平嘅入球。負責VAR嘅球證甸恩日前承認錯誤，話佢應該指示主球證安東尼泰萊去場邊睇重播，睇下需唔需要趕基斯甸羅美路出場。