效力李城10年　占美華迪續做狐狸

曾有傳被曼聯睇中嘅占美華迪，已與李斯特城提早續約兩年，踢到2024年，將會喺李城度過37歲生日。

現年35歲嘅華Dee與狐狸之前嘅合約應該到明年6月到期，但李城提早同呢位射手續約，佢2012年加盟當時喺英冠嘅李斯特城，轉會費100萬鎊，轉眼間效力狐狸已經10年。截到目前佢為李城出場387次，攻入164球，係球會史上入波第3多嘅球員。

早前，有消息指曼聯同車路士都睇中呢位射手，但好似話紅魔只願畀一年合約，家陣曼聯可以慳番。不過，李斯特城周六(20日)晚喺英超主場以1比2不敵修咸頓，啱啱新續約嘅華Dee又食白果，而且踢咗65分鐘就被換走，狀態仍然不足。

李斯特城今季踢3場英超僅1和2負，未來2場英超仲要對車路士同曼聯，真係唔易踢。