【官宣】比比加盟尼斯　即踢「阿仙奴打吡」

最強博彩盤路過關神器《串績王》：http://win.on.cc/football/　

阿仙奴周五(26日)凌晨宣布，科特迪瓦翼鋒尼高拉斯比比落實外借尼斯1季，呢位27歲球星重返成名地法甲，將着起29號波衫力求重振雄風。比比最快周日(28日)可以為尼斯上陣鬥馬賽，呢場波有機會有6名前阿仙奴球員同場比賽，成為「阿仙奴打吡」。

比比喺里爾成名，2019年阿仙奴用破紀錄7,200萬鎊將佢收購，但佢喺英超表現差勁，上季已經淪為大後備，今次重返法甲外借尼斯係佢反彈好機會。尼斯周五出戰歐協聯附加賽前，比比已經率先同球迷見面，周日對馬賽有望為尼斯披甲。

尼斯今季大事擴軍，早前已簽入另一前阿仙奴球員艾朗藍斯，2人新球季將攜手合作，而尼斯下仗對手馬賽，陣中亦有阿歷斯山齊士、古安杜斯、紐奴泰華利斯同哥拉辛拿斯4名前阿仙奴球員在陣，交鋒嗰陣肯定大把話題。