轉會市場關閉!英超3大豪門有斬獲

20220902
東網電視
更多新聞短片
最強博彩盤路過關神器《串績王》:http://win.on.cc/football/ 
周五(2日)早上歐洲主要聯賽夏季轉會市場關閉,英超3大豪門最後關頭都有重要斬獲,利物浦借用祖雲達斯中場艾法美路,舒緩中場傷兵問題。
車路士簽入巴塞隆拿射手奧巴美揚,意味呢位33歲加蓬國腳重返倫敦,將有機會倒戈鬥阿仙奴。至於曼城收購咗多蒙特中堅文路爾艾簡治,堵塞防線漏洞。
利物浦開季已有多位中場受傷,導致表現受影響,主帥高普早前表明需要增兵,最終向祖記借用艾法美路1季。
呢位26歲巴西國腳2年前由巴塞隆拿轉投祖雲達斯,上陣63場入1球及1次助攻。艾法美路加盟紅軍之後,將會着29號球員。據悉如果紅軍滿意佢表現,有權明夏用3,750萬歐元買斷呢位巴西球員。
至於今季成績同樣倒退嘅車路士,最終同巴塞隆拿達成協議,以1,200萬歐元收購奧巴美揚,雙方簽約2年,車仔同時免費放走左後衞馬高斯阿朗素畀巴塞。
值得一提,奧巴美揚早前被賊人入屋打劫,並被打傷下巴,需要休息一個半月,短期內幫唔到車仔手,車仔亦借用祖雲達斯中場薩卡利亞。
另外,曼城早前被紐卡素攻入3球,對水晶宮亦一度落後2球,加上2位中堅拿樸迪、尼敦阿基受傷,所以臨尾決定簽入中堅文路爾艾簡治,提升防線力量。
雙方簽約5年,呢位27歲瑞士國腳近年都有穩定表現,加上轉會費僅1,500萬鎊,的確抵玩。