保羅普巴復操再傷 即時開刀世盃夢危

2022年09月06日 08:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
法國中場保羅普巴世盃夢危!呢位29歲中場季前熱身受傷後,周一(5日)喺祖雲達斯復操再次「出事」,球會宣布即時安排佢進行手術根治膝傷,目前未知休息時間要幾耐,但祖記教練阿里基就表示預計普巴明年1月先至歸隊,意味佢好大機會錯過11月展開嘅卡塔爾世界盃。
祖雲達斯教練阿里基周一宣布:「普巴今朝嘗試第2次操練,但好快就停止,我哋之後決定安排佢做手術。」祖記隨後發聲明,指普巴嘅關節鏡半月板手術非常成功,但未透露實際養傷時間,意大利《天空體育》報道,普巴最快只要6個星期就可以復出,但早前有報道指佢一旦做手術,將要缺陣4月個,所以普巴受傷後一直採用保守療法,非不得已都唔做手術。
阿里基被問到普巴踢唔踢到世界盃,佢就表示:「佢踢唔踢到世界盃唔關我事,但喺祖雲達斯嘅角度,我哋預計佢明年1月回歸。」阿里基言論暗示普巴喺今年都冇機會上陣,同「養傷4個月」嘅講法更加脗合。意甲會喺11月13日暫停,讓路世盃決賽周,衞冕嘅法國會喺11月23日登場對澳洲。