你仲記唔記得　C朗20年前踢過歐霸

最強博彩盤路過關神器《串績王》：http://win.on.cc/football/　

曼聯將於周五(9日)凌晨歐霸盃分組賽，主場對皇家蘇斯達，巨星C朗有望擔正，唔講唔知，原來呢位歐聯射手王20年前曾經踢過歐霸盃前身歐洲足協盃，依家再次有機會出戰呢項賽事，感覺恍如隔世。

C朗2002/03年球季正式成為士砵亭一隊成員，有份出戰該屆歐洲足協盃，但士砵亭第一圈就出局。

當時年僅17歲嘅C朗首回合後備上陣，但球隊主場1比3不敵柏迪遜。次回合C朗踢正選，並貢獻1次助攻，幫球隊法定時間贏番3比1，需要加時決勝負，但士砵亭加時被對手追和3比3，兩回合合計輸4比6出局，C朗自此未再出席呢項賽事。

C朗過去連續19屆踢歐聯，原本想今夏轉會，繼續參加呢項大賽，但最終走唔甩，惟有同曼聯出戰歐霸盃，好似回到20年前出道時候，可能係上天嘅安排。

事實上，C朗已經捧過英超、英足盃、英聯盃、西甲、西班牙盃、意甲、意大利盃、世冠盃，歐聯、歐超盃等主要錦標，難得今季有機會爭奪歐霸盃，令獎盃櫃更完滿，對佢嘅球員生涯都係一件好事。