補時出現3入波　基沙文101分鐘絕殺！

足球博彩神器，每日重心提供盡在《彩報》：http://win.on.cc/football/　

周四(8日)凌晨歐聯B組上演戲劇性一戰，馬德里體育會主場對波圖90分鐘內互無紀錄，但喺補時階段突然風起雲湧，短時間內出現3個入波，馬體會最終靠基沙文喺補時第11分鐘絕殺贏2比1，呢球亦成為歐聯分組賽史上最遲出現嘅絕殺入球。

馬體會同波圖勢均力敵，兩隊都以防守為先形成悶戰，打破悶局關鍵出現喺81分鐘，波圖前鋒達利美禁區內「插水」，兩黃一紅被逐離場。馬體會喺人多打人少下，91分鐘由馬里奧靴莫素射門省中人彈入，點知去到96分鐘馬里奧靴莫素犯手球輸12碼，波圖由馬迪奧斯烏利比操刀追和，以為會打和之際，基沙文喺101分鐘近門頂入，帶領馬體會戲劇性贏波。

基沙文喺101分鐘入波，係歐聯分組賽史上最遲出現嘅致勝球；今仗亦係歐聯史上第2次喺出現補時階段入3球情況，之前唯一一次係1997年帕馬爾2比2和布拉格斯巴達，呢場波最後嘅入波只係96分鐘。