VAR睇漏人?祖記絕殺被屈 爆衝突4人被逐

2022年09月12日 08:00
東網電視
更多新聞短片
最強博彩盤路過關神器《串績王》:http://win.on.cc/football/ 
周一(12日)凌晨意甲出現混亂,祖雲達斯主場對沙蘭力坦拿一仗,完場前爆發大規模衝突,祖記前鋒米利克嘅補時絕殺,被VAR誤判越位,累祖記由3分變成只得1分,雙方職、球員激烈爭執互相推撞,球證出示咗4張紅牌,兩隊最終2比2打和各得1分。
近況低迷嘅祖記今場開波繼續夢遊,18分鐘就被客隊簡達華攻陷,完半場前再有基爾臣比爾馬輸12碼,比亞迪克操刀為客隊領先2比0。祖記下半場大反攻,51分鐘基爾臣比爾馬將功贖罪頭槌頂入,追成1比2接近紀錄,之後繼續圍攻對手,直到補時上演球迷奇遇記。
祖記93分鐘博到12碼,邦路斯主射雖被救出,但佢反應快成功補中追成2比2;2分鐘後祖記神奇反先,米利克接應角球頂入,佢開心到衝向場邊除衫慶祝,結果拎到第2面黃牌被逐,尷尬嘅係VAR翻睇後認為處於越位位置嘅邦路斯影響比賽,改判入球無效。VAR檢查期間雙方職、球員激烈爭執,並且互相推撞,球證事後向法斯奧(沙蘭力坦拿)、古達度(祖雲達斯)同阿里基(祖雲達斯教練)出示紅牌。
意大利《天空體育》賽後公開片段顯示,米利克頭槌入波一刻,客隊嘅簡達華喺角球旗附近已經包晒越位,數據指簡達華當時離底線2.9米,而米利克距離底線3.42米,足足有52cm嘅差距,懷疑VAR「睇漏人」。邦路斯賽後表示:「我希望球證有睇到簡達華,但冇人會知道,就算球證睇唔到,我都冇任何動作影響比賽,唔應該被吹罰。」