熱刺補時吞2蛋　干地係歐聯黑洞？

最強博彩盤路過關神器《串績王》：http://win.on.cc/football/　

今季英超成績優異嘅熱刺，周三(14日)喺歐聯D組首嘗敗仗，補時階段連失2球下，作客0比2不敵士砵亭。意大利教頭干地領軍能力受到肯定，不過佢帶隊踢歐聯成績慘不忍睹，歷來只有36%勝率，熱刺想喺歐聯發圍似乎有難度。

熱刺今場繼續用李察利臣拍住哈利卡尼、孫興民進攻，牌面強勁但踢落完全冇創造力，相反士砵亭快速反擊威脅更大，去到補時階段，包連奴接應角球頂入為主隊領先，2分鐘之後再由艾法高美斯連過數關窄角度射入，帶領士砵亭贏2比0，喺D組2戰全勝排榜首。

今屆歐聯分組賽抽籤後，熱刺被公認抽到「上上籤」，被睇好可以輕鬆出線，不過球隊表現就令人失望，上輪靠馬賽踢少個下先贏波，今場更加輸埋，干地獨沽一味嘅反擊戰術喺歐聯成為弱點，雖然佢教過祖雲達斯、車路士同國際米蘭等豪門，但最叻都係試過入歐聯8強，36次歐聯領軍只有13勝、11和、12負成績，干地出戰歐聯似乎冇乜計喎！