孫興民再交恥辱數據　干地威脅貶做後備

最強博彩盤路過關神器《串績王》：http://win.on.cc/football/　

熱刺喺歐聯輸畀士砵亭，嘗到今季首場敗仗，狀態低迷嘅南韓前鋒孫興民雖然繼續正選上陣，但表現全無起色，呢位英超金靴今仗更交出0射門嘅恥辱數據，連名將荷度都話睇得出佢信心盡失。賽前領隊干地話會考慮將孫興民貶做後備，今場之後似乎要坐言起行。

孫興民上季大放異彩，成為英超史上第1個亞洲金靴，點知今季表現判若兩人，開季8場比賽場場正選上陣，但就交出0入波、1助攻成績，唯一助攻仲係喺英超開鑼戰交出。孫興民今場對士砵亭0射門，5次扭波只得2次成功、5次傳中全部交失，結果72分鐘就被換人。

熱刺名將荷度表示：「我認為孫興民係好好嘅球員，但佢真係踢得好差，每次拎波都好擔心會控唔好，如果係一個有信心嘅球員，佢拎波前應該諗緊下一步要點做，而唔係好似孫興民依家咁樣。」干地賽前強調球隊冇必然正選，踢得唔好就要做後備，矛頭直指孫興民。