皇馬遇神殺神 半世紀最強9連勝捧盃吉兆

2022年09月19日 08:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
皇家馬德里遇神殺神!周一(19日)凌晨西甲「馬德里打吡」,皇馬憑洛迪高高斯同費達歷高華維迪入波,作客2比1擊敗最後得10人應戰嘅馬德里體育會。皇馬喺西甲6戰全勝重登榜首,係歐洲5大聯賽唯一全勝球隊,各項賽事9連勝更加係皇馬逾半世紀最佳紀錄,認真犀利!
今場「馬德里打吡」充滿火藥味,主隊中場佐治高基一開波已經凶狠踢人引爆雙方衝突,馬體會球迷亦不斷向雲尼斯奧斯祖利亞等球員唱種族歧視歌曲,不過皇馬沉着應戰,18分鐘洛迪高高斯同曹亞文尼一次精彩撞牆,前者殺入禁區順勢抽入領先。
皇馬36分鐘擴大紀錄,雲尼斯奧斯祖利亞左路突破射門中柱,但費達歷高華維迪及時趕到補射入網,個人連續第3場比賽拎到入波。馬體會完場前7分鐘由馬里奧靴莫素藉角球攻勢破蛋,而呢位守將喺補時階段更因爭位動作過火,兩黃一紅被逐,最終皇馬保住2比1勝果。
連埋歐聯同歐超盃,皇馬開季9戰全勝,係佢哋自61/62球季同68/69球季後,第3次造出開季9連勝佳績,之前2次皇馬都成功捧走西甲冠軍,可以話係捧盃吉兆!皇馬教練安察洛堤賽後表示:「皇馬有強大陣容,我哋喺賓施馬缺陣下創出呢個佳績,或者有某啲地方可以改善,但我已經唔能夠再向呢隊波要求更多!」