利物浦新兵嚴重缺態　被貶落U23操練

最強博彩盤路過關神器《串績王》：http://win.on.cc/football/　

利物浦今夏轉會窗關閉前一刻，向祖雲達斯借用中場艾法美路，但呢位26歲巴西國腳狀態嚴重不足，領隊高普決定將佢貶落U23操練同比賽，等操起狀態後，再返回大軍名單。

利物浦喺第1輪歐聯分組賽以1比4不敵拿玻里，艾法美路首次披甲，後備上陣踢咗13分鐘，高普就發現唔對路，因為呢位新兵完全冇態，身體狀況亦欠佳，所以之後冇份上陣對阿積士。

事實上，艾法美路加盟紅軍前，對上1次踢足全場，已經係4月9日為祖記對卡利亞里，加上冇參與季前備戰，狀態差並唔出奇。

因此，高普安排艾法美路去U23操練同比賽，畀佢有時間重拾狀態，艾法美路已經喺U23賽事上陣，希望可以漸入佳境啦。