意大利人才凋零　補選「啞火前鋒」

最強博彩盤路過關神器《串績王》：http://win.on.cc/football/　

意大利捧完上屆歐國盃冠軍後，迅速衰落，唔止無緣今屆世界盃決賽周，更加陷入青黃不接危機，當中以鋒線最嚴重，領隊文仙尼今次歐國聯，焗住補選已經5年冇為國家隊上陣嘅加比亞甸尼，可見情況非常惡劣。

今季表現大勇嘅拿玻里翼鋒保列坦奴受傷退隊，文仙尼補選30歲嘅加比亞甸尼，令人大感意外，因為呢位森多利亞前鋒已經缺席國際賽5年，而且長期表現低迷，職業生涯只有1季聯賽入波達雙位數，上季意甲上陣18場入得6球，被球迷嘲諷係「啞火前鋒」，補選佢可以對國家隊有幾大幫助，實在令人懷疑。

其實意大利並非冇其他優秀進攻球員，但文仙尼卻拒絕選入「首都孖寶」尼高路辛尼奧路、薩卡尼，兩人被譽為近年意大利球壇少數天才橫溢球員。據悉文仙尼棄用兩人，係因為不滿佢哋紀律欠佳，寧願揀「啞火前鋒」都唔要「天才壞孩子」。