碧咸接拍世盃廣告再惹批評 佢咁樣解畫

2022年09月22日 22:04
東網電視
更多新聞短片
碧咸(Getty Images)
足球博彩神器,每日重心提供盡在《彩報》:http://win.on.cc/football/ 
英格蘭「萬人迷」碧咸近日於倫敦現身,除咗送別英女王,原來仲有另一任務,就係接拍一個卡塔爾世盃廣告,收取數百萬英鎊報酬,但亦惹來人權分子非議。
先講個廣告,係為卡塔爾世盃零食贊助商Doritos做宣傳,內容以搞笑為主,廣告主角除咗碧咸,仲有美式足球巨星曼寧,主要係透過佢兩個去區分英式足球同美式足球嘅差異。
一名消息人士表示:「今次係兩位在各自領域擁有非凡成就及極具影響力嘅運動員合作,有極高報酬,不過任何同卡塔爾有關嘅事情都會引起爭議。」
碧咸係卡塔爾世盃代言人,合約價值超過1億鎊,佢亦一直受到非議,因為卡塔爾長期存在人權問題,法律對婦女有高度限制,同性戀亦屬非法,不過碧咸行走江湖多年自然識點拆,佢透過發言人表示:「過去十多年定期到訪卡塔爾,亦深信足球力量可以推動當地各方不斷進步。」
此外,英格蘭隊長哈利卡尼日前宣布,卡塔爾世盃期間將佩戴彩虹主題袖標,以表示對平等權利嘅支持。