法國贏波「護級」在望　基奧特入波創紀錄

最強博彩盤路過關神器《串績王》：http://win.on.cc/football/　

周五(23日)凌晨歐國聯A1組大戰，法國主場以2比0擊敗奧地利，成功擺脫榜尾位置，「護級」形勢大好。老將基奧特今場有入波，距離法國史上入波最多球員亨利只差2球，好大機會登上「士哥王」寶座！

法國雖然有賓施馬受傷，但代替嘅基奧特同基利安麥巴比、基沙文依然合作無間，56分鐘基利安麥巴比中場引球突破，殺入禁區射成1比0；65分鐘基沙文傳中，基奧特「泰山壓頂」頂入，法國最終贏2比0，目前以1分反壓奧地利升上第3位，下輪作客丹麥贏波就肯定護級成功。

基奧特今場成為主角，佢以35歲357日之齡入波，打破名將馬治喺1959年創下嘅紀錄(35歲287日)，成為法國史上最老入波球員，而基奧特喺國家隊亦累積49球，距離終極士哥王亨利(51球)只差2球。以基奧特目前狀態，年底世界盃決賽周多數有份，基奧特仲有機會打破紀錄。