荷蘭孖寶傷出　巴塞一晚損失3主力

最強博彩盤路過關神器《串績王》：http://win.on.cc/football/　

國際賽期啱啱先至開始，西甲勁旅巴塞隆拿已受到「FIFA病毒」侵襲！周五(23日)凌晨歐國聯A4組賽事，荷蘭作客2比0擊敗波蘭，但法蘭基迪莊同迪比先後傷出，加上另一仗法國中堅祖利斯古迪亦打柴，巴塞隆拿一晚就損失3位主力，認真慘情。

荷蘭今場13分鐘就由加普先開紀錄，貝雲積60分鐘為球隊鎖定2比0勝局，不過「橙衣軍團」呢場勝仗亦付出沉重代價，古普美拿斯開賽幾分鐘已經撞傷頭，要用擔架床抬走；法蘭基迪莊因大腿不適，只踢半場就被換走，而迪比亦喺52分鐘大腿受傷退下火線，目前未知傷勢有幾嚴重，下輪大戰比利時上陣成疑。

除法蘭基迪莊同迪比之外，另一巴塞球星祖利斯古迪亦喺代表法國上陣「出事」，佢喺對奧地利一仗只踢23分鐘就因大腿肌肉受傷，要由軍醫扶住離場，實際傷情同樣要等進一步檢查。