西班牙選尼高拉斯威廉斯　阻加納搶人？

足球博彩神器，每日重心提供盡在《彩報》：http://win.on.cc/football/　

西班牙將會喺歐國聯對陣瑞士同葡萄牙，領隊安歷基今次點兵亦有新面孔，20歲畢爾包翼鋒尼高拉斯威廉斯首度獲得徵召，有傳安歷基係想盡早畀尼高拉斯威廉斯「賣身」西班牙，以防佢會效法哥哥伊拿基威廉斯，轉國籍去代表加納出賽。

伊拿基威廉斯今年7月宣布代表加納出賽，今個國際賽期首度入選加納大軍，但「細佬」尼高拉斯威廉斯就入選西班牙國家隊，安歷基表示：「我選佢唔係要阻止加納挖角，而係因為佢非常有潛質，尼高拉斯威廉斯今季上陣時間增加，亦有明顯進步，佢喺U21嗰陣我已經好鍾意呢個球員。」

尼高拉斯威廉斯開季6場聯賽有2入波2助攻，獲西班牙徵召亦係實至名歸，安歷基更有個「大膽」諗法：「我相信威廉斯屋企人會好開心，幻想下如果兩兄弟都入選世盃大軍，然後加納同西班牙喺決賽相遇，將會成為一時佳話！」