同尼馬互相輝映　美斯入2球幫阿根廷大勝

20220924
  • 東網電視
    更多新聞短片
    最強博彩盤路過關神器《串績王》：http://win.on.cc/football/　
    巴西大勝加納3比0，尼馬有2次助攻，另1支南美勁旅阿根廷亦喺周六(24日)早上熱身賽同樣贏洪都拉斯3比0，球王美斯射入2球，同巴黎聖日耳門隊友尼馬互相輝映。
    阿根廷今場3個入波都同美斯有關，開賽16分鐘，呢位35歲老將策動攻勢，長傳入禁區左路，艾真度高美斯接應第一時間橫傳，由拿達路馬天尼斯近門射入。
    美斯之後遭對手粗野撞跌，一度引起雙方球員衝突，幸好並冇釀成暴力事件。美斯以行動還擊，上半場補時射入12碼，下半場再把握對手防線犯錯，巧妙笠射入網，協助阿根廷大勝3比0。
    值得一提，今場係美斯球員生涯首次射入洪都拉斯大門，已累積入31支唔同國家隊。包括球會及國家隊賽事，美斯今季踢12場比賽，射入8球及8次助攻，狀態非常出色。
    另外，阿根廷已經保持34場不敗，進一步逼近意大利創造嘅37場最長國際賽不敗紀錄。